Lohkandiploma

LOHKANDIPLOMA

Bures boahtin čađahit lohkandiploma!

Dán máhpas gávnnat rávvagiid mo čađahit lohkandiploma ja maiddái girjelisttuid, girjeguigosiid ja bargobihtáid evttohusaid.

Lohkandiploma ulbmil lea movttiidahttit lohkat. Lohkandiploma sáhtát čađahit vuođđoskuvllas juohke jagi.

Lohkan buorida lohkandáiddu ja doalvu du eará máilmmiide. Buorre lohkandáidu veahkeha du birget álkibut eallimis. Girjjálašvuođa bokte mis lea vejolašvuohta mannat čada iežamet dovdduid ja vásáhusaid. Lohkamiin sáhttit oahppat áddet buorebut eará olbmuid eallima. Girjjálašvuhtii gullá maiddái buori ja bahá guorahallan, daguid riektavuođa ja boasttuvuođa ádden olbmo eallima morálas.

Sámegielat girjjálašvuođa lohkan láidesta oahppi/lohkki sámekultuvrii ja oahpaha máidnasiid ja muitalusaid bokte sámi árvomáilmmi ja vieruid birra.

Lohkanteknihkka ovdána lohkamiin ja lohkandáidu buorrána mađi eambo lohká. Máŋggabeallásaš lohkan lasiha sátneriggodaga ja ovddida giellaipmárdusa. Dat maiddái buoreda lohkki girjjálaš olggosbuktima dáiddu.

Lohkandiploma teavstta vuođđun lea muhtun osiin Anára gieldda sámegielat lohkandiploma "Lohkanboazu", mii lea gávdnamis peda-net -siidduin.